Bakı, 22 aprel, AZƏRTAC
Aprelin 22-də Azərbaycanın kənd təsərrüfatı naziri Heydər Əsədov BMT-nin Ərzaq və Kənd Təsərrüfatı Təşkilatının (FAO) ölkəmizə yeni təyin olunmuş nümayəndəsi Mustafa İmirlə görüşüb.
Nazirlikdən AZƏRTAC-a bildiriblər ki, nazir Heydər Əsədov Azərbaycanın tarixən aqrar ölkə olduğunu, müstəqillik əldə etdikdən sonra iqtisadiyyatımızın yüksək templə inkişaf etdiyini, ölkə rəhbərliyinin aqrar sektora böyük önəm verdiyini, bu sahənin inkişafı ilə bağlı mühüm qərar və sərəncamların qəbul edildiyini qonağın diqqətinə çatdırıb.
Nazir qeyd edib ki, Azərbaycan 1995-ci ildən FAO-nun üzvüdür və hazırda ekoloji təmiz kənd təsərrüfatının inkişaf etdirilməsi, kənd təsərrüfatı məhsullarının marketinqi, çəyirtkələrə qarşı mübarizənin yaxşılaşdırılması, ərzaq təhlükəsizliyi, toxum sektorunun inkişafı, kənd əhalisinin yaşayışının yüksəldilməsi, heyvan sağlamlığı və heyvandarlıqda damazlıq işinin təşkili kimi bir çox sahələrdə FAO-nun texniki yardımından faydalanır.
Azərbaycanın ərzaq, kənd təsərrüfatı və təbii ehtiyatlar sahəsində böyük potensiala malik olduğunu, eləcə də mühüm nailiyyətlərə imza atdığını deyən Mustafa İmir respublikamızda aqrar sektorun inkişafı üçün öz təcrübəsindən və bacarığından istifadə edəcəyini diqqətə çatdırıb. Mustafa İmir Kənd Təsərrüfatı Nazirliyi ilə FAO arasında əlaqələrin bundan sonra da inkişaf etdirilməsi üçün səylərini əsirgəməyəcəyini bildirib.