Bakı, 22 aprel, AZƏRTAC
BMT-nin baş katibi Pan Gi Mun İtaliyanın Baş naziri Matteo Rensi ilə telefon danışığı zamanı Aralıq dənizini keçmək istəyərkən tələf olan mühacirlərlə bağlı vəziyyəti müzakirə edib və Avropa ölkələrini bu insanları təhlükəsiz alternativ kanalla təmin etməyə çağırıb. Bu barədə təşkilatın mətbuat xidməti məlumat verib.
AZƏRTAC TASS informasiya agentliyinə istinadla xəbər verir ki, məlumatda, həmçinin BMT-nin baş katibi və İtaliyanın Baş nazirinin Aralıq dənizini keçən mühacir və qaçqınların təhlükəsizliyinə görə beynəlxalq ictimaiyyətin də məsuliyyət daşıdıqları barədə razılığa gəldiyi bildirilir.
Böhrana reaksiya verdiyinə görə İtaliyaya minnətdarlığını bildirən Pan Gi Mun Aralıq dənizində inkişaf etmiş ümumi Avropa xilasetmə mexanizminin vacibliyini vurğulayıb.
BMT-nin məlumatına görə 2014-cü ildə Avropa sahillərinə keçməyə cəhd edərkən ən azı 3,5 min nəfər həlak olub. Bir neçə gün öncə Aralıq dənizində baş verən ən iri gəmi qəzası nəticəsində isə Liviyadan olan 700 mühacir itkin düşüb. Beynəlxalq Miqrasiya Təşkilatı 2015-ci ilin ötən dövründə artıq 1,7 min adamın dənizdə boğularaq həyatını itirdiyini qeyd edib.