​Amerikada oynayan Nərimandan nə xəbər var?

Azərbaycan futbolunun son dövrlərdə yetişdirdiyi ən perspektivli gənc istedadlardan biri olan Nəriman Axundzadənin okeanın o tayındakı karyerası həm yerli, həm də xarici idman mətbuatının diqqət mərkəzindədir.

Metbuat.az xəbər verir ki, cari ilin fevral ayında Ağdamın “Qarabağ” klubundan ABŞ-nin MLS təmsilçisi “Columbus Crew” komandasına transfer olunan 22 yaşlı hücumçunun Amerikadakı hazırkı durumu və statistik göstəriciləri futbol ictimaiyyəti tərəfindən maraqla izlənilir.

Avropa liqalarından fərqli olaraq, MLS-də çempionat yaz-payız sistemi ilə keçirilir. 2026-cı ilin fevralında start götürən MLS mövsümü hazırda tam sürətlə davam edir və dekabr ayında başa çatacaq. Bu səbəbdən turnir cədvəlində mövqelər uğrunda qızğın mübarizə gedir.

“Columbus Crew” klubuna qoşulduqdan sonra gənc vinger tədricən komandanın əsas heyətinə uyğunlaşmağa çalışır. MLS-in spesifik oyun üslubuna və fiziki hazırlıq tələblərinə adaptasiya prosesi keçən Nəriman, hazırda komandada əsasən “sonradan oyuna daxil olan qüvvə” rolunu oynayır.

Cari MLS mövsümündə o, komandasının heyətində 6 qarşılaşmada şans qazanıb və bu oyunların hamısında meydana sonradan, əvəzetmədən daxil olub. Təəssüf ki, futbolçumuz hələ ki MLS oyunlarında qol və ya assistlə fərqlənə bilməyib. Meydanda keçirdiyi az vaxt daxilində fəallığı ilə seçilsə də, yekun zərbələrdə bəxti gətirməyib. Lakin Nəriman ABŞ-dəki ilk rəsmi statistikasını ölkə kubokunda qeyd edib. Mayın 21-də keçirilən “Lamar Hunt U.S. Open Cup” turniri çərçivəsində “New York City FC” komandasına qarşı keçirilən gərgin oyunda meydana çıxan Axundzadə 1 məhsuldar ötürmə (assist) ilə yadda qalıb və komandasının hücum xəttinə canlanma gətirib.