Naxçıvan, 21 aprel, AZƏRTAC 
“Naxçıvan” Universitetində Bəxtiyar Vahabzadənin anadan olmasının 90 illiyi münasibətilə “Sandıqdan səslər” adlı tədbir keçirilib.
Universitetin mətbuat xidmətindən AZƏRTAC-a bildirilib ki, tədbiri açan ali təhsil ocağının rektoru, professor İsmayıl Əliyev dövlətimizin başçısı İlham Əliyevin Bəxtiyar Vahabzadənin 90 illik yubileyinin keçirilməsi haqqında imzaladığı Sərəncamı xatırladıb və bunun görkəmli şairin irsinə verilən qiymətin bariz nümunəsi olduğunu qeyd edib.
Tədbirdə universitetin tədris işləri üzrə prorektoru, tarix üzrə fəlsəfə doktoru, dosent İbrahim Kazımbəyli və tərbiyə işləri üzrə prorektor Əli Yusifov çıxışlarında diqqətə çatdırıblar ki, B.Vahabzadə 70-dən artıq şeir kitabının, 2 monoqrafiyanın, 11 elmi publisist kitabın və yüzlərlə məqalənin, eləcə də tarixi və müasir mövzuda 20-dən artıq iri həcimli poemanın müəllifidir. Şairin əsərləri, şeir kitabları, dramları və publisistik yazıları dünyanın bir çox dillərinə, o cümlədən ingilis, fransız, alman, fars, türk, ispan, macar, dillərinə tərcümə edilib.
Bildirilib ki, B.Vahabzadə bədii yaradıcılığa 1943-cü ildə “Ana və şəkil” adlı ilk şeirini çap etdirməklə başlayıb. O vaxtdan dövri mətbuatda şeirləri, elmi məqalələri, rəyləri müntəzəm çap olunub. “Mənim dostlarım” adlı ilk kitabında toplanan lirik şeirlərdə faşizmə qarşı mübarizədə qalib çıxmış xalqın duyğu və düşüncələri öz əksini tapıb. Onun lirik şeir və poemalarında, mənzum pyeslərində müasir dövrün problemləri lirik-fəlsəfi planda, yeni əlvan boyalarla təsvir edilir. “İkinci səs”, “Vicdan”, “Yağışdan sonra”, “Yollara iz düşür”, “Fəryad”, “Hara gedir bu dünya”, “Özümüzü kəsən qılınc”, “Cəzasız günah”, “Dar ağacı” pyesləri Azərbaycan Dövlət Akademik Milli Dram Teatrında tamaşaya qoyulub.
Sonra tələbələrin ifasında şeir və mahnılar səsləndirilib.