Tokio, 21 aprel, AZƏRTAC
Yaponiya və ABŞ Trans-Sakit okean Tərəfdaşlığı (TPP) üzrə danışıqlarda irəliləyişə nail olublar. Bu barədə Yaponiyanın iqtisadi bərpa naziri Akira Amari Tokioda iki ölkənin rəsmiləri arasında iki gün davam edən danışıqlardan sonra məlumat verib.
Aprelin 21-də mətbuata açıqlama verən A.Amari bildirib ki, hər iki ölkə son razılığın əldə olunmasına çox yaxındır. Lakin bununla yanaşı, hələ də razlaşdırılmamış məsələlər var və tam razılığın əldə edilməsi üçün daha çox güc sərf olunmalıdır.
A.Amari ilə ABŞ-ın ticarət nümayəndəsi Maykl Froman arasında danışıqlar aprelin 21-də başa çatıb. Danışıqlar zamanı ABŞ-a ixrac olunacaq yapon düyüsünün kvotası və avtomobillərə, onların komponentlərinə ABŞ tərəfindən təyin olunan tariflərin ləğvi məsələləri müzakirə edilib.
A.Amari qeyd edib ki, M.Fromanla birlikdə onlar TPP üzrə danışıqlarda irəliləyişə nail ola biliblər və bu, Yaponiya və ABŞ liderlərinin gələn həftə keçiriləcək sammitində müsbət qarşılanacaq.
Vüqar Ağayev
AZƏRTAC-ın xüsusi müxbiri
Tokio