Bakı, 20 aprel, AZƏRTAC 
Azərbaycan Respublikasının Prezidenti yanında Dövlət İdarəçilik Akademiyasının (DİA) siyasi idarəetmə və Bakı Dövlət Universitetinin (BDU) hüquq fakültələrinin dördüncü kurs tələbələri hazırda Azərbaycan Respublikası Ombudsman Aparatında istehsalat təcrübəsi keçirlər.
Ombudsman Aparatından AZƏRTAC-a bildiriblər ki, təcrübə müddətində tələbələrə həm nəzəri, həm də praktiki dərslər keçiriləcək. Müvəkkil və aparatın məsul əməkdaşları insan hüquqlarının mahiyyəti, əsas prinsipləri, beynəlxalq və milli müdafiəsi mexanizmləri, Ombudsmanın elmi-analitik, informasiya təminatı və ictimaiyyətlə əlaqələr, beynəlxalq əlaqələr sahəsində fəaliyyəti, qaçqınların, məcburi köçkünlərin və miqrantların, ahılların, əlilliyi olan şəxslərin, uşaqların, hərbi qulluqçuların, məhkumların hüquqlarının müdafiəsi, mülki, siyasi, iqtisadi, sosial və mədəni hüquqların müdafiəsi sahəsində fəaliyyəti və s. ilə bağlı mövzular üzrə mühazirələr oxuyacaqlar.
Elmi-tədqiqat təcrübəsi keçən tələbələr, həmçinin ərizəçilərin qəbulu və vətəndaşların şikayətlərinə baxılması prosesində iştirak edəcək, təsisatın insan hüquqları kitabxanasının fondundakı çox sayda hüquqi nəşrlərdən faydalanacaqlar.
Tələbələrlə ilk məşğələni Ombudsman, professor Elmira Süleymanova aparıb. O, ölkəmizdə həyata keçirilən hüquqi islahatlar, ölkə Prezidentinin 2011-ci il 27 dekabr tarixli Sərəncamı ilə təsdiq edilmiş Azərbaycan Respublikasının insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının əsas müddəaları, bu mühüm sənədin implementasiyası, qanunvericiliyin təkmilləşdirilməsi və hüquq mədəniyyətinin inkişaf etdirilməsi sahəsində görülmüş işlər haqqında ətraflı məlumat verib.
Müvəkkilin təşəbbüsü ilə BDU-da insan hüquqları fənninin tədris olunduğu, Ombudsmanın əməkdaşlarının DİA-da qısamüddətli ixtisasartırma kurslarına, yenidən hazırlanma və dövlət idarəçiliyi üzrə əlavə ali təhsilə cəlb edildiyi, Təhsil Nazirliyi ilə razılaşdırılmış qaydada uşaq hüquqları üzrə pilləli tədris proqramının ümumtəhsil məktəblərində uğurla həyata keçirildiyi bildirilib.