Bakı, 20 aprel, AZƏRTAC
Aprelin 20-də Çin Mərkəzi Bankının ölkə iqtisadiyyatını stimullaşdırmağa yönəltdiyi tədbirlər fonunda neftin qiyməti artmağa başlayıb.
AZƏRTAC Vestifinance.ru saytına istinadla xəbər verir ki, Londonun ICE Futures birjasında brent markalı neftin barrelinin iyun ayına olan fyuçerslərinin qiyməti 1,1 faiz bahalaşaraq 64,24 dollarda qərarlaşıb. WTI markalı neftin barrelinin qiyməti isə Nyu-Yorkun əmtəə birjasındakı (NYMEX) elektron hərracda 1,26 faiz artaraq 56,44 dollardan satılıb.
Çin Mərkəzi Bankı ölkədə zəifləyən iqtisadi artıma dəstək üçün banklara tətbiq edilən məcburi ehtiyat normasını 1 faizlik punkta qədər aşağı salıb. Ehtiyatlara azalan tələblər maliyyə böhranından bəri ən əhəmiyyətli tədbir olub. Dəyişikliklər bu gündən etibarən qüvvəyə minib. Beləliklə də, Çin bankları tərəfindən ehtiyata toplanmalı olan pul vəsaitlərinin səviyyəsi 19,5 faizdən 18,5 faizə qədər azalıb.
Həftə ərzində ABŞ-da neft buruqlarının sayının 26 ədəd azalaraq 2010-cu ilin minimum səviyyəsinə - 734 buruğa düşməsinə dair Baker Hughes neft-servis kompaniyasının məlumatları da neft bazarına öz təsirini göstərib.