Bakı, 20 aprel, AZƏRTAC
İqtisadiyyat və Sənaye Nazirliyinin və "Təmiz Şəhər" ASC-nin əməkdaşları tezliklə istifadəyə veriləcək Böyükşor bulvarında və parkında aparılan abadlıq və yaşıllaşdırma işlərinə dəstək göstərmək məqsədilə ağacəkmə aksiyası keçiriblər. Aksiya zamanı ərazidə xeyli sayda ağac və kol bitkiləri əkilib.
AZƏRTAC xəbər verir ki, 15 hektara yaxın ərazisi olan Böyükşor bulvarında və parkında 80 min ağac və kolun əkilməsi nəzərdə tutulur. Artıq həmin bitkilərin böyük hissəsi əkilib. Park və bulvar may ayında hazır olacaq.
Böyükşor gölündə aparılan kompleks bərpa işləri nəticəsində su hövzəsində və sahilində çoxlu sayda müxtəlif quşlar müşahidə olunur. Aksiyası zamanı ağaclardan çoxlu sayda quş yuvaları asıblar.
Qeyd edək ki, Böyükşor gölünün kompleks bərpası iki mərhələdə həyata keçirilir. Birinci mərhələ bu ilin may ayınadək başa çatdırılacaq. Artıq gölü iki mərhələyə bölən və 8 xətli yolun özülü olan bənd inşa edilib, su mübadiləsi sistemi yaradılıb, xüsusi hidrotexniki qurğular quraşdırılıb, bütün mülki tikinti işləri yekunlaşıb. Layihə ərazisindəki su hövzəsinin dibinin təmizlənməsi işləri yekunlaşır, abadlıq və landşaft işlərinin son mərhələsi icra olunur. Layihənin növbəti mərhələsində isə gölün digər tərəfinin təmizlənməsi işləri həyata keçiriləcək.