Bakı, 17 aprel, AZƏRTAC
Azərbaycan Respublikasının Prezidenti yanında Bilik Fondunun "Dünya elmi Azərbaycanda" proqramı çərçivəsində Koreyanın KİAS İnstitutunun direktoru, kvant mexanikası və nəzəri fizika sahələri üzrə mütəxəssis, professor Kim Jaevan ölkəmizdə səfərdədir.
Fonddan AZƏRTAC-a bildiriblər ki, koreyalı qonaq Bilik Fondunun icraçı direktoru Oqtay Səmədov və əməkdaşlarla görüşüb. O.Səmədov professor Kim Jaevana Bilik Fondunun həyata keçirdiyi layihələr, maarifçilik sahəsində fəaliyyət istiqamətləri barədə geniş məlumat verib.
Səmimi görüşə görə Bilik Fondunun rəhbərliyinə və kollektivinə təşəkkürünü bildirən professor Kim Jaevan Fondun layihələri ilə maraqlanıb, rəhbəri olduğu KİAS İnstitutu barədə ətraflı məlumat verib.
Səfər çərçivəsində professor Kim Jaevan Bilik Fondunun əməkdaşları ilə birgə ölkənin bir sıra elm və təhsil müəssisələrində, dövlət qurumlarında olub.
Koreya Respublikasının ölkəmizdəki fövqəladə və səlahiyyətli səfiri Çoi Suk-İn ilə görüşən professor Kim Jaevan Azərbaycandakı görüşlərdən məmnun qaldığını, Bilik Fondu ilə əməkdaşlığını daha da genişləndirmək niyyətində olduğunu bildirib.