Bakı, 17 aprel, İbrahim Əsədov, AZƏRTAC
Bakı Dövlət Universitetində (BDU) “Bakı-2015” ilk Avropa Oyunlarına həsr olunan “Birinci Avropa Oyunları uşaqların gözü ilə” mövzusunda tədbir keçirilib.
AZƏRTAC xəbər verir ki, BDU-nun “Gənc İstedadlar” liseyi və Nizami rayonu 62 nömrəli məktəb-lisey tərəfindən təşkil olunan tədbirdə BDU-nun rektoru, Milli Məclisin deputatı, akademik Abel Məhərrəmov Azərbaycan Prezidenti İlham Əliyevin apardığı məqsədyönlü siyasətin uğurlu nəticələrindən danışıb.
Azərbaycanın qazandığı nailiyyətlərdən bəhs edən rektor ölkəmizin dinamik inkişaf etdiyini, son illər beynəlxalq aləmdə nüfuzunun daha da yüksəldiyini vurğulayıb.
İlk Avropa Oyunlarına geniş hazırlıq işləri görüldüyünü bildirən akademik A.Məhərrəmov bu tədbirin böyük əhəmiyyətini qeyd edib. Rektor tədbirə 50-dək ölkənin nümayəndələrinin qatılacaqlarını xatırladıb.
Akademik A.Məhərrəmov “Bakı-2015” ilk Avropa Oyunları Təşkilat Komitəsinin sədri Mehriban xanım Əliyevanın tədbirin təşkilində əvəzsiz xidmətlərini diqqətə çatdırıb.
Qeyd olunub ki, tədbirin yüksək səviyyədə keçirilməsinə tələbələr, o cümlədən BDU-da təhsil alan gənclər də dəstək verirlər.
62 nömrəli məktəb-liseyin direktoru Mətanət Cabbarlı “Bakı-2015” ilk Avropa Oyunlarının dünyada böyük diqqət və maraq doğuracağına əminliyini bildirib, ölkəmizin bütün sahələrdə olduğu kimi idman sahəsində də böyük uğurlar qazandığını söyləyib.
Sonra liseylərin şagirdləri “Birinci Avropa Oyunları uşaqların gözü ilə” adlı ədəbi-bədii kompozisiya nümayiş etdiriblər.