Düşənbə, 17 aprel, AZƏRTAC
Bu ilin martında Tacikistan parlamentinin yuxarı palatası - Məclisi Milliyə seçkilər keçirildikdən sonra Prezident Emoməli Rahmonun iştirakı ilə qanunverici orqanın ilk iclası keçirilib.
Əvvəlcə iclasda təşkilati məsələlərə baxılıb. Tacikistanın birinci prezidenti, Məclisi Millinin üzvü Kaxxor Maxkamov bundan əvvəl parlamentin yuxarı palatasının sədri işləmiş Maxmudsaid Uboydulloevin namizədliyini yenidən Məclisi Millinin sədri vəzifəsinə irəli sürüb.
Səsvermə nəticəsində Maxmudsaid Uboydulloev yenidən Məclisi Millinin sədri seçilib. Abduraxmon Kadiri sədrin birinci müavini, Şadixon Camşed isə müavin seçilib.
Dövlət başçısı Emoməli Rahmon parlamentin yeni seçilmiş rəhbərliyini və deputatları təbrik edib, onlara fəaliyyətlərində uğurlar arzulayıb.
Qeyd edək ki, Məclisi Millinin sədri prezidentdən sonra ölkədə ikinci yüksək vəzifədir. Məclisi Millinin 33 üzvü var. Onların 25-i səsvermə yolu ilə seçilir, səkkiz deputat isə dövlət başçısı tərəfindən təyin olunur.

Qulu Kəngərli
AZƏRTAC-ın xüsusi müxbiri
Düşənbə