Şəmkirdə şahmat üzrə Avropa çempionu, bir sıra beynəlxalq turnirlərin qalibi, mərhum Vüqar Həşimovun xatirəsinə həsr olunan beynəlxalq "Shamkir Chess 2015" turniri keçiriləcək.

ANS PRESS-in məlumatına görə, Azərbaycanda keçirilən şahmat turnirində ilk dəfə olaraq 3 dünya çempionu mübarizə aparacaq. beynəlxalq qrossmeyster, Avropa çempionu Vüqar Həşimovun xatirəsinə həsr olunan “Shamkir Chess 2015” super turniri aprelin 16-dan 26-dək keçiriləcək.

Şahmat üzrə dünyanın aparıcı qrossmeysterləri Maqnus Karlsen, sabiq dünya çempionu Vişvanatan Anand artıq Şəmkirdədirlər.

Mötəbər yarışda hazırkı dünya çempionu Maqnus Karlsen (Norveç, 2863), sabiq dünya çempionları Vişvanatan Anand (Hindistan,2791), Vladimir Kramnik (Rusiya, 2783), FİDE reytinq siyahısında 2-ci olan Fabiano Karuana (İtaliya, 2802), Aniş Giri (Hollandiya, 2790), Uesli So (ABŞ, 2788), Maksim Vaşi-Lagrav (Fransa, 2716), həmçinin azərbaycanlı qrossmeysterlər, Avropa çempionları Şəhriyar Məmmədyarovla (FİDE reytinqində 13-cü yer, 2756), Teymur Rəcəbov (20-ci yer, 2738) və Azərbaycan çempionatının son qalibi Rauf Məmmədov (92-ci yer, 2658) iştirak edəcəklər.

Tədbir Şəmkirdəki Heydər Əliyev Mərkəzində təşkil olunacaq. Super-turniri www.shamkirchess.az veb-səhifəsindən birbaşa izləmək mümkündür. Bütün oyunlar Azərbaycan, rus və ingilis dillərində şərh olunacaq.

Qeyd edək ki, turnirin mükafat fondu 100 000 avro təşkil edir.
Mənbə
ANS PRESS