"Hazırda Vətənində törətdiyi cinayət əməllərinə görə ölkəsinin hakimiyyəti tərəfindən axtarışa verilən, əvvəllər Ukraynanın ən yaxşı dostu sayılan Gürcüstanın sabiq prezidenti Mixail Saakaşvili Donetskdə mülki şəxslərin qətlində iştirak edən gürcü muzdlularına təşəkkür edib."

ANS PRESS-in məlumatına görə, Rusiyanın "Pravda.Ru" saytı yazıb ki, M.Saakaşvili hazırda Ukrayna tərəfində vuruşan keçmiş gürcü hərbçiləri ilə görüşüb. Kiyevin "Xilaskar" məbədində baş tutan görüşdə əvvəlcə ümumi dua oxunub. O, öz həmyerliləri ilə qürur duyduğunu deyib.

Onun sözlərinə görə, gürcü hərbçilərindən bir çoxu vaxtilə Gürcüstanın Silahlı Qüvvələrində, Daxili İşlər Nazirliyində xidmət keçiblər və hazırda Ukraynanın müstəqilliyi, ərazi bütövlüyünü müdafiə etmək üçün Donetskdə vuruşurlar. Burada vuruşmaq üçün ABŞ-dan və başqa ölkələrdən də hərbçilər gəliblər.

Xatırladaq, Gürcüstanda Mixail Saakaşvilini büdcə vasitələrinin bədxərcliyində ittiham edirlər. Gürcüstanın Baş Prokurorluğu ona bir neçə cinayət işi üzrə, həmçinin təqribən 5 milyon dollar dövlət vəsaitini şəxsi ehtiyacları üçün xərcləməsi barədə qiyabi ittiham irəli sürüb. M.Saakaşvilinin Gürcüstana təhvil verilməsi barədə təklif Ukrayna tərəfindən rədd edilib. Ukrayna prezidenti Pyotr Poroşenko M.Saakaşvilini özünə məsləhətçi təyin edib.

Mənbə
ANS PRESS