Bakı, 13 aprel, AZƏRTAC
Aprelin 16-19-da Heydər Əliyev adına İdman-Konsert Kompleksində sərbəst və yunan-Roma güləşi üzrə yeniyetmə və gənclər arasında Azərbaycan Güləş Federasiyasının Kuboku uğrunda ənənəvi beynəlxalq turnir keçiriləcək. Budəfəki turnir iyunda Bakıda keçiriləcək ilk Avropa Oyunlarının güləş yarışlarına test xarakteri daşıyır.
AZƏRTAC xəbər verir ki, turnirdə Azərbaycan pəhləvanları ilə yanaşı, Ukrayna, İran, Özbəkistan, Gürcüstan, Slovakiya, Türkmənistan, Macarıstan, Qazaxıstan, Qırğızıstan, Rusiya, Belarus və Türkiyə güləşçiləri iştirak edəcəklər.
Turnirin proqramına əsasən aprelin 16-da yunan-Roma güləşi üzrə yeniyetmələr, bir gün sonra yunan-Roma güləşi üzrə gənclər, aprelin 18-də sərbəst güləş üzrə yeniyetmələr, ertəsi gün isə sərbəst güləş üzrə gənclər mübarizə aparacaqlar.
Qalib və mükafatçılar Azərbaycan Güləş Federasiyası tərəfindən medal, diplom və pul mükafatı ilə təltif olunacaq.