Berlin, 11 aprel, AZƏRTAC
AFR-in Konstitusiyanın Mühafizəsi üzrə Federal İdarəsinin başçısı Hans-Georq Masen “Reuters” informasiya agentliyinə müsahibəsində bildirib ki, islamçıların kiberhücumları yeni səviyyəyə çıxıb. H.G.Masen deyib: “Hətta Fransanın “TV5 Monde” telekanalına haker hücumlarının arxasında kimin dayanması hələ dəqiq müəyyən olunmasa da, “burada virtual mübarizənin yeni keyfiyyətini görmək olar”.
H.G.Masen fikrinə aydınlıq gətirərək bildirib ki, Avropada cihadçıların kibercinayəti indiyə qədər, əsasən, məqsədyönlü güclü hücumlar, yaxud saytlar ilə manipulyasiya etmək ilə məhdudlaşıb. “TV5 Monde”yə haker hücumundan danısan Masen onu “demokratik KİV-lərə qarşı aqressiv güc nümayişi adlandırıb”.
İnformasiya Texnikası sahəsində Federal Təhlükəsizlik İdarəsinin vitse-prezidenti (BSI) Andreas Könen Fransa telekanalındakı hadisənin Almaniyada belə hücumlara yol açacağından ehtiyatlandığını bildirib. O, “ARD” telekanalının efirində müdafiənin yaxşılaşdırılmasına, xüsusən, su və elektrik təchizatı kimi infrastrukturların müdafiəsinin yaxşılaşdırılmasına tələbat olduğunu bildirib, çünki kompyuterlər tərəfindən idarə olunan texnika məhz həmin infrastrukturlarda tətbiq edilir.
Vüqar Seyidov
AZƏRTAC-ın xüsusi müxbiri
Berlin