Bakı, 10 aprel, AZƏRTAC
AZƏRTAC-ın xarici KİV-lərə istinadən verdiyi xəbərə görə, keçmiş mütləq dünya çempionu və 1988-ci ilin olimpiya çempionu, Britaniya boksçusu Lennoks Lyuis bildirib ki, hazırda super ağır çəkidə təcrübəli ukraynalı Vladimir Kliçkonun layiqli rəqibi yoxdur.
Buna görə də rusiyalı Aleksandr Povetkin üç nüfuzlu versiya üzrə Dünya çempionu titullarının sahibi ilə revanş döyüşünə can atmasına dəyməz.
L.Lyuis deyib: “Hazırda mən Kliçkoya rəqib görmürəm, o, super ağır çəkiyə tam nəzarət edir. Onunla çox oğlanlar döyüşüb, amma onların kifayət qədər təcrübəsi olmayıb və hamısı uduzub. Məsələn, hazırda onunla döyüşəcək Ceninqsin peşəkarlarla 19 döyüşü olub. Bu, yetərli deyil, Kliçko ilə döyüşmək üçün təcrübə toplamaq lazımdır”.
Hazırda 38 yaşlı Kliçko Beynəlxalq Boks Federasiyası (IBF), Ümumdünya Boks Təşkilatı (WBO) və Ümumdünya Boks Assosiasiyası (WBA) versiyaları üzrə Dünya çempionu titulları daşıyır. Ümumiyyətlə, ukraynalı idmançı 63 qələbə qazanıb (53 nokaut) və üç dəfə məğlub olub. O, növbəti döyüşü aprelin 25-də Nyu-Yorkda amerikalı Brayant Cenninqslə keçirəcəkdir.
Rusiyalı idmançının ukraynalı boksçu ilə yarışında iştirak etmiş L.Lyuis deyib: “Aleksandr Povetkinin həmişə qələbəyə sansı olacaq, çünki o, ürəklə döyüşür. Mən belə hesab etmirəm ki, o, Kliçko ilə yenə döyüşməlidir. Bəlkə də bir az gözləmək lazımdır ki, Vladimir karyerasını bitirsin, sonra dünya çempionu olar”.
2013-cü ilin payızında Moskvada Povetkin ilə Kliçko arasında döyüş xal üzrə Aleksandrın məğlubiyyəti ilə başa çatıb. Hesabında 28 qələbə (20 nokaut) və bir məğlubiyyət olan Povetkin özü karyerasının başlıca məqsədini Kliçko ilə revanş döyüşündə görür.
Mayın 22-də Moskvada o, amerikali Deontey Uaylderin sahib olduğu titulu - Ümumdünya Bokş Şurasının (WBC) Dünya çempionu titulunu qazanmaq üçün mütləq iddiaçı adı uğrunda kubalı Mayk Pereslə görüşəcək.