Bakı, 10 aprel, AZƏRTAC
Artıq dördüncü ildir ki, “British Council Azərbaycan” təşkilatı və “PAŞA Bank” ənənəvi “Gələcəyə təşəbbüs” yazı müsabiqəsini elan edir.
Bununla əlaqədar aprelin 10-da “British Council”ın əməkdaşı Nigar Nəsrullayeva Bakı Dövlət Universitetinin (BDU) beynəlxalq layihələr şöbəsində tələbələr üçün təqdimat edib.
BDU-dan AZƏRTAC-a bildiriblər ki, ali təhsil müəssisələrinin tələbələri arasında keçirilən müsabiqənin əsas məqsədi tələbələrə ölkənin iqtisadi inkişafı və sosial-iqtisadi islahatlarını müzakirə etmək üçün imkan yaratmaq, həmçinin, gəncləri Azərbaycanın gələcək inkişafında daha fəal rol oynamağa sövq etməkdir.
Layihənin əsas fəaliyyəti Azərbaycanın müxtəlif ali təhsil müəssisələrində təqdimatların keçirilməsi, inşa yazma qabilliyyəti, istinad və plaqiatçılıq mövzuları üzrə seçilmiş tələbələrə təlimlərin keçirilməsi və təlim keçmiş namizdələr tərəfindən inşaların yazılmasından ibarətdir.
İştirakçılar Azərbaycan vətəndaşı olmalı və təqdimat üçün nəzərdə tutulan ali təhsil müəssisələrinin 18-22 yaşlı tələbələri olmalıdırlar. Müsabiqənin üç qalibi cari ilin iyul-avqust aylarında Böyük Britaniyanın aparıcı universitetlərindən birində yay məktəbində iştirak edəcək.
Müsabiqənin finalçılarına “PAŞA Bank” tərəfindən müxtəlif dəyərli hədiyyələr, həmçinin, layihədə uğurlu iştiraka görə sertifikatlar təqdim olunacaq.