Sumqayıt, 10 aprel, Ətrabə Rzayeva, AZƏRTAC
Sumqayıt Dövlət Universitetində ( SDU) AİDS, sağlam həyat tərzi, humanitar dəyərlərin yayımı, ilk tibbi yardım mövzularında tələbələri maarifləndirmək məqsədilə tədbirlər mütəmadi təşkil edilir. Ölkə Prezidenti İlham Əliyevin müvafiq Sərəncamı ilə təsdiqlənən “Hemofiliya və talassemiyadan əziyyət çəkən uşaqlara qayğı” Dövlət Proqramının icrası çərçivəsində aprelin 10-da universitetdə Qızıl Aypara Cəmiyyəti Sumqayıt şəhər bölməsinin təşkilatçılığı, şəhər səhiyyə şöbəsinin dəstəyi ilə “Humanizm naminə” devizi altında qanvermə aksiyası keçirilib.
AZƏRTAC xəbər verir ki, aksiya zamanı 105 nəfər bu xeyirxah məramlı tədbirdə qan verdi. Respublika Elmi Tədqiqat Hematologiya və Transfuziologiya İnstitutunun Mərkəzi Qan Bankının xüsusi tibb briqadasının həkim-hematoloqları əvvəlcə tələbələrin sağlamlıq durumunu müəyyənləşdiriblər. Götürülən qan nümunələri laboratoriyada müayinə olunduqdan sonra talassemiyalı və digər irsi qan xəstələrinin müalicəsində istifadə ediləcəyi bildirilib.
Aksiyanın keçirilməsinin əsas məqsədi irsi qan xəstəliklərindən əziyyət çəkənlərə dəstək olmaq və cəmiyyətin diqqətini bu məsələyə yönəltməkdir.
Universitetin tələbə və əməkdaşları qanvermə aksiyasına könüllü qatılıb və bu cür aksiyaların təşkilini yüksək qiymətləndiriblər.
Toplanan qan Mərkəzi Qan Bankına təhvil verilib.