Bakı, 9 aprel, AZƏRTAC
“Ekol Mühəndislik Xidmətləri” Qapalı Səhmdar Cəmiyyətinin (QSC) tullantıların emalı departamenti (TED) tərəfindən bu ilin birinci rübündə Heydər Əliyev adına neft emalı zavodunun ayrı-ayrı sahələrindən mexaniki təmizləyici qurğulara daxil olan 3 milyon 704 min kubmetrə qədər sənaye-çirkab, axıntı suları təmizlənib və texnoloji proseslər nəticəsində formalaşan 6 min 310 tona qədər neftşlam emal edilərək zərərsizləşdirilib. Hesabat dövründə departamentin 3-cü sahəsinə “AAS-EKOL” MMC-dən daxil olan 37 tondan çox ərsin parafini sudan və mexaniki qarışıqlardan təmizlənib.
QSC-dən AZƏRTAC-a bildirilib ki, ötən üç ayda müəssisənin ayrı-ayrı “Sifarişçi” təşkilatlarından qəbul edilmiş 13 min 778 ton/kubmetrdən çox müxtəlif növ tullantılar departament tərəfindən texnoloji reqlamentə uyğun təmizlənib və emal edilərək zərərsizləşdirilib.