Bakı, 9 aprel, AZƏRTAC
Hindistanın Daxili İşlər Nazirliyi Greenpeace beynəlxalq ekoloji qeyri-hökumət təşkilatının yerli banklardakı 8 bank hesabını dondurub.
AZƏRTAC TASS informasiya agentliyinə istinadla xəbər verir ki, Greenpeace təşkilatının Hindistan bölməsi bundan sonra xaricdən maliyyələşə bilməyəcək. Ekoloqların məlumatına görə, keçən il təşkilat xaricidən 100 milyon rupi (təxminən 1,7 milyon dollar) pul köçürməsi qəbul etmişdi.
Hökumət Hindistan kəşfiyyatının Greenpeace və bəzi başqa qeyri-hökumət təşkilatlarının ölkənin inkişafının zəiflətdiyi barədə qeydlərin olduğu məruzələrini araşdırdıqdan sonra bu addımı atmağa məcbur olduğunu bildirib.
Qeyd edək ki, Hindistan martın 4-də xaricdən maliyyələşən 69 qeyri-hökumət təşkilatının fəaliyyətini qadağan etmişdi. Kəşfiyyat xidmətinin məlumatına görə, 2014-cü il ərzində qeyri-hökumət təşkilatları “Hindistanda vəziyyətin qeyri-stabilliyinə yönələn aksiyalar” üçün 1,6 milyard dollardan artıq vəsait alıb.