Bakı, 8 aprel, AZƏRTAC
Xəzər-Avropa İnteqrasiya İşgüzar Klubunun (CEIBC) üzvləri aprelin 8-də “Avropa” otelində Azərbaycan Respublikası Dövlət Miqrasiya Xidmətinin (DMX) rəisi Firudin Nəbiyev ilə görüşüblər.
Çıxış edən klubun baş icraçı direktoru Telman Əliyev qurumun fəaliyyəti barədə məlumat verib. Bildirib ki, CEIBC-nin əsas məqsədi dövlət orqanları və biznes nümayəndələri arasında əlaqələri inkişaf etdirməkdir. O, təşkilatın üzv şirkətlərinə göstərdiyi diqqət və dəstəyə görə Dövlət Miqrasiya Xidmətinin rəhbərliyinə minnətdarlıq edib.
Sonra F.Nəbiyev Dövlət Miqrasiya Xidmətinin yaranma tarixi, fəaliyyət istiqamətləri barədə iştirakçılara ətraflı məlumat verib.
Görüşdə şirkətlər Azərbaycanın miqrasiya siyasəti ilə bağlı suallara cavab tapmaq, problemlərin həll yollarını axtarmaq, həmçinin bizneslə Dövlət Miqrasiya Xidməti arasındakı fəal dialoqu davam etdirmək üçün təkliflər irəli sürmək imkanı qazanıb.
Tədbirdə kluba üzv şirkətlərlə yanaşı, onunla əməkdaşlıq edən təşkilatlar, xüsusilə də Azərbaycan Sahibkarlar (İşəgötürənlər) Konfederasiyası, ATİB, TUSİAB və Azərbaycan Sığortaçılar Assosiasiyasının, müxtəlif səfirliklərin nümayəndələri də iştirak edib.