Bakı, 8 aprel, AZƏRTAC
Milli Məclisin deputatı Qənirə Paşayeva Parisdə Azərbaycanın Dostları Assosiasiyasının və ölkəmizin Fransadakı səfirliyinin təşkilatçılığı ilə keçirilmiş “Qadın hüquqları, Azərbaycan dəyərləri” adlı tədbirdə çıxış edərək Ermənistanın işğalçılıq siyasətindən, 20 ildən artıqdır doğma yurdlarına qayıda bilməyən məcburi köçkün qadınlardan danışıb. O, Fransanı Ermənistanın işğalçılıq siyasətinə sərt münasibət göstərməyə çağırıb.
Deputat qeyd edib ki, Azərbaycanın müstəqilliyini bərpa etdiyi ilk illər xüsusilə qadınlar üçün çox ağır bir dövr olmuşdu. Çünki qonşu Ermənistanın Azərbaycan ərazisinin 20 faizini işğal etməsi nəticəsində Ermənistandan qovulan 200 mindən artıq azərbaycanlı da daxil olmaqla 1 milyondan artıq insan öz evini, işini itirmişdi. İşğal zamanı 20 mindən çox azərbaycanlı öldürülüb, minlərlə qadın ailə üzvlərini, yaxınlarını itirib. Yüzlərlə qadın girov götürülüb və işgəncələrə məruz qalıb. Onların bir hissəsi bu işgəncələr nəticəsində həyatını itirib, bir hissəsi beynəlxalq təşkilatların dəstəyi ilə azad edilsələr də, böyük travmalar yaşayıblar. Çox təəssüf ki, beynəlxalq təşkilatların qətnamə və qərarlarına baxmayaraq, 20 ildən artıqdır 1 milyondan çox azərbaycanlı qaçqın və məcburi köçkün, o cümlədən yüz minlərlə qadın bu gün öz evinə qayıda bilmir.
Deputat vurğulayıb ki, etnik kimliyindən və dini inancından, harada baş verməsindən asılı olmayaraq, insan haqlarının bu qədər kobud şəkildə tapdalanmasına göz yumulmamalıdır. O insanlar fransız dostlarımızdan məhz bu cür mövqe gözləyirlər.
Q.Paşayeva qadınlarımızın cəmiyyətə inteqrasiyası, onların təhsili, iş yerləri, məşğuliyyəti ilə bağlı həyata keçirilən dövlət proqramlarından da danışıb. O, eyni zamanda, Azərbaycan qadınlarının fəallığının, onların bütün sahələrdə, o cümlədən dövlət idarəçiliyində rollarının daha da artırılması, qadın haqlarının qorunması istiqamətində görülən işlər və qəbul olunmuş qanunlar, dövlət qadın siyasətinin həyata keçirilməsində ölkənin birinci xanımı, Heydər Əliyev Fondunun prezidenti Mehriban Əliyevanın dəstəyi barədə də məlumat verib.
Deputat Azərbaycanda məişət zorakılığı da daxil olmaqla qadına qarşı şiddətin bütün formaları ilə, erkən nikahlarla fəal mübarizə aparıldığını deyib.