Əmək və Əhalinin Sosial Müdafiəsi Nazirliyi (ƏƏSMN) respublikanın bölgələrində yaşayan əlilliyi olan şəxslərə və sağlamlıq imkanları məhdud uşaqlara səyyar formada protez-ortopedik bərpa xidmətini davam etdirir.

Nazirliyinin İctimaiyyətlə əlaqələr şöbəsindən ANS PRESS-ə bildirilib ki, Bakı Protez-Ortopedik Bərpa Mərkəzinin mütəxəssislərindən ibarət səyyar tibbi-texniki briqada aprelin 8-də Balakən və Zaqatala, aprelin 9-da Qax və Şəki, aprelin 10-da isə Oğuz və Qəbələ rayonlarında olacaq. Həmin rayonlarda əlilliyi olan sakinlər və sağlamlıq imkanları məhdud uşaqlar səyyar formada protez-ortopedik bərpa xidməti, yuxarı və aşağı ətraf protezləri, ortopedik ayaqqabı, müxtəlif reabilitasiya vasitələri və s. ilə təmin ediləcəklər. Xidmət göstəriləcək şəxslərin əvvəlcədən qeydiyyatı aparılıb.

Xatırladaq ki, qeyd olunan səyyar tibbi-texniki briqada 2013-cü ilin sonlarında yaradılıb. Ötən müddətdə respublikanın müxtəlif rayonları üzrə 1850 nəfərə yaxın əlilliyi olan şəxsə və sağlamlıq imkanları məhdud uşağa səyyar formada protez-ortopedik bərpa xidməti göstərilib.
Mənbə
ANS PRESS