Tbilisi, 3 aprel, AZƏRTAC
Cari ilin 3 ayında Gürcüstanı ziyarət edən xarici vətəndaşlar sırasında azərbaycanlılar birinci yerdədir.
Gürcüstan Daxili İşlər Nazirliyinin Analitik İnformasiya Departamentinin yaydığı məlumata görə, yanvar-mart aylarında Azərbaycandan bu ölkəyə 110456 nəfər gəlib. Gürcüstanı ziyarət edən xarici ölkə vətəndaşları sırasında 96132 nəfərlə Türkiyə ikincidir.
Ümumiyyətlə ilin birinci rübündə Gürcüstana 986366 nəfər xarici vətəndaş gəlib. Ötən ilin yanvar-mart aylarında isə Gürcüstanı 1010323 nəfər xarici ölkə vətəndaşı ziyarət edib. Bu il gələnlərin 348770-i turist olub, 203841 nəfər bu ölkədən tranzit keçidi edib. Qalan 433755 nəfəri isə Gürcüstana başqa məqsədlərlə gəlib.
Məlumatda bildirilir ki, turistlərin sayı 2014-cü ilin eyni dövrü ilə müqayisədə 7,4 faiz azalıb, tranzit vətəndaşların sayı isə 15,3 faiz artıb.

Xətayi Əzizov
AZƏRTAC-ın xüsusi müxbiri
Tbilisi