Bakı. 3 aprel. REPORT.AZ/ Rusiyanın Anapa şəhərində Nikolay Pavlyukovun xatirəsinə həsr olunan gənclər arasında boks turniridə azərbaycanlı boksçular uğursuz çıxış edib. "Report"un məlumatına görə, bu gün rinqə çıxan döyüşçülər məğlubiyyətlə üzləşib.
49 kq çəki dərəcəsində mübarizə aparan Samir Hüseynli Qazaxıstan nümayəndəsi Saken Biboşinova uduzaraq, yarımfinala vəsiqə qazana bilməyib. Şükran Mehdiyev də (91 kq) 1/4 finalda yarışla vidalaşıb. Azərbaycanlı boksçu rusiyalı Dmitri Marutkinə məğlub olub – 0:3. Hacı Dilbazovun (75 kq) yolunu isə Rusiya nümayəndəsi kəsib. O, Tulpar Atayevlə dueldən məğlub 0:3 hesablı məğlubiyyətlə ayrılıb.
Superağır çəki dərəcəsində çıxış edən Nihat Orucov isə Gürcüstan boksçusu Georgi Zurebeani ilə qarşılaşmada zədələnərək, görüşü sonadək davam etdirə bilməyib.
Qeyd edək ki, bununla da Azərbaycan boksçuları yarışda mübarizəni dayandırıb.