Xarici ölkə nümayəndələri Dağlıq Qarabağda keçiriləcək saxta seçkiləri müşahidə edəcək.

ANS PRESS-in məlumatına görə, Kaliforniya ştatının Fresno dairəsindən Andreas Borqeas Qarabağdakı "seçki"lərdə müşahidəçi kimi iştirak edəcək.

Borqeas 25 aprel - 5 may tarixlərində Qarabağda səfərdə olacaq. Bununla yanaşı, Azərbaycan Respublikasının Dağlıq Qarabağ regionunda təşkil olunacaq qurama seçkilərini ABŞ-dan iki nümayəndə də izləyəcək.

Saxta seçkilərdə həmçinin müşahidəçi qismində Meksika, Argentina və Kanada kimi ölkələrin nümayəndələri də iştirak edəcək.

Azərbaycan Respublikasının Xarici İşlər Nazirliyi Azərbaycanın işğal edilmiş ərazilərində Ermənistan Respublikası tərəfindən yaradılmış separatçı rejimin təcavüz və irqi ayrı-seçkiliyin mütləq nəticəsi olduğu bir daha vurğulayır. Bu rejim Ermənistanın idarəçiliyi və nəzarəti altındadır. Ermənistanın Azərbaycana qarşı müharibəyə başladığı və zordan istifadə edərək, Dağlıq Qarabağ və ətraf yeddi rayon daxil olmaqla, Azərbaycan ərazisinin 20 faizini işğal etdiyi və bir milyondan artıq azərbaycanlını öz doğma torpaqlarından didərgin salaraq etnik təmizləmə həyata keçirdiyi və digər ağır cinayətlər törətdiyi hamıya yaxşı məlumdur.

Azərbaycan ərazilərinin hərbi işğalı və etnik təmizləmənin davam etdiyi zəmində qondarma separatçı rejimin strukturlarına “seçkilər”in keçirilməsi Azərbaycan Respublikasının Konstitusiyasının və beynəlxalq hüququn norma və prinsiplərinin açıq şəkildə pozulmasıdır və buna görə də bu “seçkilər”in heç bir hüquqi qüvvəsi ola bilməz.

Azərbaycan Respublikası bir daha Ermənistan tərəfini əbəs yerə vaxt itirmək və öz xalqı və beynəlxalq ictimaiyyəti aldatmaq əvəzinə təcavüz və etnik təmizləmə siyasətinə son qoymağa və münaqişənin nizamlanması prosesinə konstruktiv şəkildə iştirak etməyə və beynəlxalq öhdəliklərinə əməl etməyə çağırır.
Mənbə
ANS PRESS