Bakı, 1 aprel, AZƏRTAC
ADA Universitetinin Xəzər Enerji və Ətraf Mühit Mərkəzi Azərbaycan Respublikası Dövlət Neft Şirkətinin (SOCAR) əməkdaşlığı ilə iyulun 4-17-də 9-cu Bakı Yay Enerji Məktəbini təşkil edəcək.
Universitetdən AZƏRTAC-a bildirilib ki, iki həftəlik sertifikat proqramı enerji və ətraf mühit məsələlərini təhlil etmək üçün dünyanın tanınmış alim, mütəxəssis və siyasətçilərini bir araya gətirəcək. İştirakçılar enerji və ətraf mühit, enerji hüququ və iqtisadiyyatı, neft-qaz sənayesində idarəçilik və SOCAR-ın strateji perspektivləri kimi məsələlərlə tanış olacaqlar.
Bakı Yay Enerji Məktəbi dünyanın müxtəlif ölkələrindən olan dövlət və özəl neft şirkətlərinin rəhbərləri ilə görüşmək və əlaqə qurmaqda böyük imkanlar yaradır. Yay məktəbində Azərbaycanın xarici işlər, energetika, ekologiya və təbii sərvətlər nazirləri ilə yanaşı, “TAP”, “BP”, “ExxonMobil”, “Total”, “Statoil”, “PETRONAS” və digər neft şirkətlərinin yüksək vəzifəli şəxsləri çıxış edəcəklər. Müəllimlərin siyahısı Oksford Universiteti, Sciences-Po, Prinston Universiteti, Rusiya Elmlər Akademiyası və s. kimi dünya şöhrətli elm mərkəzlərinin tanınmış mütəxəssisləri ilə tamamlanacaq.
İştirakçıların həm də Azərbaycanda neft sənayesinin keçmişi və müasir tarixi ilə bağlı olan Sənqəçal neft terminalını, Azərbaycanın ilk neft maqnatı Hacı Zeynalabdin Tağıyevin ev muzeyini, Nobel qardaşları muzeyini və başqa tarixi yerlərə baş çəkmək fürsəti olacaq. Proqram tamamlandıqdan sonra iştirakçılara ADA Universitetinin rektoru Hafiz Paşayevin və SOCAR-ın prezidenti Rövnəq Abdullayevin imzalayacaqları sertifikatlar təqdim ediləcək.
İştirak və proqram haqqında daha ətraflı məlumat üçün aşağıdakı linkə daxil olmaq lazımdır: http//www.ccee.ada.edu.az/summerschool