Quba, 31mart, Elxan Yusifli, AZƏRTAC
Bu gün Quba Soyqırımı Memorial Kompleksi və ərazidəki kütləvi məzarlığı minlərlə soydaşımız ziyarət edir. Azərbaycanın hər bir bölgəsindən burda nümayəndə var. Amma vaxt var idi, xalqımıza başına gətirilən müsibətlər haqqında danışmağa belə imkan verilmirdi. Erməni quldurlarının azərbaycanlılara qarşı soyqırımı törətməsi haqqında dünya ictimaiyyəti heç nə bilmirdi. Qubadakı kütləvi məzarlığın aşkarlanması bir daha daha sübut etdi ki, tarixi saxtalaşdırmaq cəhdləri daim uğursuzluğa məhkumdur və həqiqət gec-tez üzə çıxır.
Bu sözləri AZƏRTAC-a müsahibəsində məzarlığın ziyarətçilərindən olan Quba şəhər Texniki Təmayüllü Liseyin tarix müəllimi Elxan Məmmədov söyləyib.
“Qubada elə bir ailə yoxdur ki, ötən əsrin əvvəllərində xalqımıza qarşı törədilən soyqırımının acısını yaşamasın. 1918-ci ilin mart və aprel aylarında Quba şəhərində üç mindən artıq soydaşımız qətlə yetirilib. Ümumilikdə isə Quba qəzasında 16 mindən çox insan soyqırımına məruz qalıb. Amma bütün bunların müqabilində erməni lobbisi özünü əzilmiş xalq kimi təqdim etməyə çalışır, mövcud olmayan soyqırımı haqqında yalanlar uyduraraq dünyaya sırımaq istəyirlər. Şükürlər olsun ki, tarix ədaləti bərpa etməkdədir. Ermənilərin soyqırımına məruz qalması mifi yox olur və əvəzində onların özlərinin soyqırımı törətdiyi dünya ictimaiyyətinin diqqətinə çatdırılır”, - deyə tarix müəllimi vurğulayıb.