Bakı, 30 mart, Tərgül Ağayeva, AZƏRTAC
“Türkiyə Universitetləri Məzunları” İctimai Birliyinin (İB) üzvləri martın 30-da Şəhidlər xiyabanında Azərbaycanın azadlığı və ərazi bütövlüyü uğrunda mübarizədə canlarından keçmiş qəhrəman Vətən oğullarının və qızlarının xatirəsini yad ediblər.
İctimai Birliyin üzvləri türk şəhidlərinin xatirəsinə ucaldılmış abidəni də ziyarət edib, önünə çiçəklər düzüblər.
Sonra 31 Mart – Azərbaycanlıların Soyqırımı Gününə həsr olunan “dəyirmi masa” keçirilib.
AZƏRTAC xəbər verir ki, tədbirdə İB-nin sədri Çingiz Bayramov 1918-1920-ci illərdə ermənilərin xalqımıza qarşı törətdikləri qanlı cinayətlərdən danışıb. Qeyd olunub ki, qəsbkar düşmən zaman-zaman dəhşətli faciələr törədib, günahsız qanlar axıdıb.
Mənfur ermənilərin bu gün də qəsbkarlıq siyasəti apardıqlarını bildirən Anadolu Universitetinin “Azərbaycan proqramları”nın rəhbəri Azər Hətəmov deyib ki, bu barədə dünya ictimaiyyətinə daha ətraflı və dolğun informasiyalar, məlumatlar çatdırılmalıdır.