Paris, 29 mart, AZƏRTAC
Martın 24-də Barselonadan Düsseldorf istiqamətində uçan təyyarənin tapılan “qara qutusu”nda qəzadan əvvəl içəridə gedən danışıqların yazısı aşkar edilib. Qəzadan bir qədər əvvəl yerli vaxtla saat 10.27-də təyyarənin kapitanı S. Patrik ikinci pilot A.Lubitzə Düsseldorfa eniş etməsi barədə tapşırıq verib. A. Lübitz isə ona “Ümid edirəm. Baxarıq” kimi müəmmalı cavab verib.
Bir neçə dəqiqəlik kabinəni tərk edən komandir geri qayıdarkən kabinənin qapısını bağlı görüb və ikinci pilotdan onu açmağı xahiş edib. Cavab almayan komandir qapını möhkəm döyərək “Allahı sevirsənsə, qapını aç!” deyə qışqırmağa başlayıb. Yenidən cavab almayan S. Patirk “Lənətə gəlmiş qapını aç!”, - deyə tələb etsə də, ikinci pilot qapını açmaqdan imtina edib. Vəziyyəti belə görən komandir balta ilə qapını sındırmağa cəhd göstərib. Bu zaman qutuda sərnişinlərin fəryadı eşidilib və elə bu an qəza baş verib.
Baş verən bu hadisə A.Lubitzin bilərəkdən qəza törətdiyini bir daha sübuta yetirir.
Əsgər Əliyev
AZƏRTAC-ın xüsusi müxbiri
Paris