Daşkənd, 29 mart, AZƏRTAC
Özbəkistan prezident seçkilərinə hazırdır.
Bu gün səhər Özbəkistanda keçiriləcək prezident seçkilərində ölkədəki bütün siyasi partiyaları təmsil edən dörd namizəd iştirak edəcək.
Bu haqda Daşkənddə keçirdiyi brifinqdə Özbəkistan Mərkəzi Seçki Komissiyasının sədri Mirzə-Uluqbek Abdusalamov məlumat verib.
Onun sözlərinə görə, bunlar Sahibkarlar və İşgüzar Adamlar Hərəkatı - Liberal-Demokratik Partiyasından hazırkı dövlət başçısı İslam Kərimov, “Milli Dirçəliş” Demokratik Partiyasından Akmal Saidov, Özbəkistan Xalq-Demokratik Partiyasından Xotamjon Ketmanov və “Ədalət” Sosial- Demokrat Partiyasından Narimon Umarovdur.
Komissiya sədri bildirib ki, seçkiləri dünyanın 43 ölkəsi və beş beynəlxalq təşkilatdan gəlmiş 300-dən artıq müşahidəçi izləyəcək. Prezident 5 illik müddətə seçiləcək.
Azərbaycan Mərkəzi Seçki Komissiyasının sədri Məzahir Pənahovun rəhbərliyi ilə Azərbaycan nümayəndə heyəti də beynəlxalq müşahidəçilərin tərkibində seçkiləri izləyəcək.
Qulu Kəngərli
AZƏRTAC-ın xüsusi müxbiri
Daşkənd