Moskva ABŞ-ın CNN telekanalına Rusiya ərazisində fəaliyyət üçün icazə verib.

ANS PRESS-in məlumatına görə, hökumət tərəfindən CNN-ə 10 il ərzində universal yayım lisenziyası verilməsi barədə əmr imzalanıb.

Rusiyanın bir çox mətbuat orqanı yazıb ki, məşhur CNN telekanalı 1998-ci ilin sonlarından başlayaraq Rusiyada yayıma başlayıb. Həmin ildən kabel və peyk yayımı həyata keçirilib. Ötən il telekanal fəaliyyətini dayandırıb.

Belə ki, Rusiya qanunvericiliyinə dəyişiklik ödənişli kabel telekanallarında reklamı qadağan edib. CNN isə xarici yayım üçün nəzərdə tutulmuş reklamdan texniki baxımdan imtina etməyib.

Xatırladaq ki, bu ilin yanvarın əvvəlində CNN-nin Rusiya ərazisində fəaliyyətinin bərpası üçün danışıqlar aparılıb və bir ay əvvəl CNN-ə yeni qeydiyyat şəhadətnaməsi verilib.
Mənbə
ANS PRESS