Bakı. 22 mart. REPORT.AZ/ "Bəzi türklər və azərbaycanlılar bəzi ermənilərdən daha ləyaqətlidirlər".
"Report" "Kavkazskiy uzel"ə istinadən xəbər verir ki, bu sözləri İrəvanda keçirilən mediaforum iştirakçıları ilə görüşü zamanı Ermənistan prezidenti Serj Sarkisyan bildirib.
"Bizim çətin tarixi dönəmlərimizdə çox hallar olub ki, bəzi türklər və azərbaycanlılar özlərini bəzi ermənilərdən daha ləyaqətli aparıblar. Tarixdə belə faktlar çoxdur. Bu çox mühüm amildir".
Qeyd edək ki, 18-23 mart tarixlərində keçirilən mediaforumun əsas mövzusu qondarma erməni soyqırımıdır.
Söhbət zamanı Ermənistan-Türkiyə protokollarına toxunan Serj Sarkisyan, onların parlamentdən geri götürülməsinin hələ son olmadığını bildirib:
"Mən protokolları parlamentdən geri götürmək qərarına gəldim. Lakin bu o demək deyil ki, biz Türkiyə ilə mümkün barışıqdan imtina edirik".
O bildirib ki, protokollar əsasən Azərbaycan amili səbəbindən təsdiq edilməyib:
"Mən əminəm ki, Azərbaycan amili olmasaydı, protokollar artıq çoxdan imzalanmışdı".