Xaçmaz, 20 mart, Elxan Yusifli, AZƏRTAC
Azərbaycanın hər bir bölgəsinin özünəməxsus gözəlliyi var. “Ölkəmizi tanıyaq” maarifləndirici tur-aksiya çərçivəsində buna bir daha əmin olduq. Azərbaycanın şimal bölgəsinin Quba, Qusar, Xaçmaz kimi rayonlarının təbiət mənzərələri ilə yanaşı tarixi abidələri, insanları, adət-ənənələri ilə yaxından tanış olmaq imkanı qazandığım üçün özümü xoşbəxt hiss edirəm. Ekskursiya zamanı dolğun biliklərlə yanaşı yaxın dostlar da qazandım.
Bu fikirləri AZƏRTAC-a müsahibəsində Quba-Qusar-Xaçmaz marşrutu üzrə tur-aksiyada iştirak edən Naxçıvan Muxtar Respublikasının Şahbuz şəhəri 1 nömrəli tam orta məktəbin XI sinif şagirdi Həlimə Teymurlu səsləndirib.
Doğma şəhərinə xoş təəssüratlarla qayıtdığını bildirən məktəbli deyib: “Qusardakı “Şahdağ” Qış-Yay Turizm Kompleksi, Qubadakı kütləvi məzarlıq, Xaçmazdakı açıq səma altında “Şəxsiyyətlər Muzeyi” yaddaşımda iz salan məkanlar oldu. Bu səfər bizim üçün həm də “açıq dərs” oldu. Rayonların hər birində Tarix-Diyarşünaslıq Muzeylərində olub ərazinin tarixi barədə ətraflı məlumat almaq imkanımız yarandı.”