Bakı, 19 mart, AZƏRTAC
Azərbaycan Respublikası Dövlət Neft Şirkətində (SOCAR) daim diqqət mərkəzində saxlanılan sosial yönümlü məsələlərdən biri də erməni işğalçıları tərəfindən doğma yurd-yuvalarından didərgin düşmüş həmvətənlərimizə maddi və mənəvi dəstək göstərilməsidir. Hər il dövlət bayramları ərəfəsində SOCAR-ın təmsilçiləri şirkətin himayəsində olan qaçqın və məcburi köçkün ailələrinin məskunlaşdığı qəsəbələrə baş çəkir, onlara humanitar yardımlar, bayram sovqatları təqdim edirlər.
Dövlət Neft Şirkətinin mətbuat xidmətindən AZƏRTAC-a bildirilib ki, artıq ənənə halını almış xeyriyyəçilik missiyasına sadiq qalan SOCAR tərəfindən Novruz bayramı münasibətilə Ağdam rayonunun “Dördyol 1,2”, “Təzəkənd” qəsəbələrində və Dördyol-Mamırlı ərazisində sığınacaq tapmış 10 min 522 nəfər, Füzuli rayonunun Əhmədalılar, Mirzənağılı və Qazaxlar kəndlərində məskunlaşmış 4 min nəfər, Tərtər rayonunda müvəqqəti yaşayışla təmin olunmuş 13 min nəfər, Sumqayıt şəhərində məskunlaşmış 1700 nəfər qaçqın və məcburi köçkünə ümumi çəkisi 236.7 tona yaxın ərzaq yardımı aparılıb.
SOCAR-ın baş ofisinin nümayəndələri məcburi köçkünlərlə görüşərək, onları Novruz bayramı münasibətilə təbrik edib, əmin olduqlarını bildiriblər ki, Prezident İlham Əliyevin rəhbərliyi altında Azərbaycanda aparılan uğurlu daxili və xarici siyasət qaçqın və məcburi köçkün ailələrinin tezliklə öz doğma el-obalarına qayıtmalarına şərait yaradacaq. Qəsəbələrin sakinləri onlara göstərilən diqqət və qayğıya görə dövlətimizin başçısına və SOCAR-ın rəhbərliyinə minnətdarlıqlarını bildiriblər.