Stokholm, 19 mart, AZƏRTAC
İsveç hökuməti yerli “Saab Kockums” hərbi-sənaye müəssisəsindən iki yeni sualtı qayığın alındığını açıqlayıb.
Bu barədə İsveçin müdafiə naziri Peter Hultkvist məlumat verib. O, bu qərarı dünyaya mühüm xəbərdarlıq da adlandırıb. Nazir deyib: “Bu növ sualtı qayıqlar məsrəf baxımından çox əlverişlidir, böyük sensor gücünə və uzaq fəaliyyət radiusuna malikdir. Bu son dərəcə yüksək texnoloji sualtı qayıqlar İsveçin müdafiə qabiliyyətini möhkəmləndirməyə xidmət edəcək”.
Gözlənildiyinə görə, yeni sualtı qayıqlar İsveç Hərbi Dəniz Qüvvələrinin (HDG) sərəncamına 2020-ci ildə veriləcək. Nəzərdə tutulan sərmayənin həcmi 8,2 milyard İsveç kronu təşkil edəcək.
Qeyd edək ki, son vaxtlar İsveç Baltika regionunda təhlükəsizlik ilə bağlı vəziyyətin pisləşməsi, sahil sərhəd xəttinin pozulması, habelə Ukraynada baş verən münaqişə ilə bağlı özünün müdafiə qabiliyyətini möhkəmləndirmək siyasəti yürüdür. Məsələn, “Saab” və “FMV” (İsveç Müdafiə Nazirliyinin maddi-texniki təminat idarəsi) İsveç Silahlı Qüvvələrinin sualtı müdafiə qabiliyyəti barəsində niyyət protokolu imzalayıblar. Protokol sualtı qayıqların və digər sualtı sistemlərin inkişaf etdirilməsini, layihələndirilməsini və istehsal edilməsini ehtiva edir. Potensial sifarişlərin məbləği təqribən 11,2 milyard İsveç kronuna bərabərdir.

Rauf Əliyev
AZƏRTAC-ın xüsusi müxbiri
Stokholm