Bakı, 17 mart, AZƏRTAC
Azərbaycanın qarşıya qoyduğu əsas hədəflərdən biri də respublikamızı regionun tranzit informasiya mərkəzinə çevirməkdir. Bu istiqamətdə daha bir ilkə imza atılması - Məlumatların Emalı və Saxlanılması Mərkəzinin (MESM) qurulması üzrə işlərə başlanması bu məqsədin reallaşmasına artıq bir addım da yaxınlaşdırır. Azərbaycanda ilk Tier III səviyyəli regional DATA Mərkəzin qurulması İKT sahəsində əldə olunan ən böyük uğurlardan hesab edilir.
Rabitə və Yüksək Texnologiyalar Nazirliyinin Beynəlxalq Əlaqələr və Hesablaşma Mərkəzinin direktor müavini Məzahim Quliyev AZƏRTAC-a bildirib ki, MESM-in 2015-ci ilin birinci rübündə istismara verilməsi nəzərdə tutulur. Bu, öz növbəsində, informasiya texnologiyaları sahəsində Azərbaycanda baş verən mühüm hadisə olacaqdır. Bütün proseslər başa çatdıqdan sonra DATA Mərkəzlərin sertifikatlaşdırılması sahəsində ixtisaslaşan “Uptime” İnstitutunun mütəxəssisləri sertifikatlaşdırma (design certificate və facility certificate) mərhələsini yerinə yetirəcəklər. Bu da prosesin dəqiqliklə icra olunduğunu, mərkəzin fəaliyyət keyfiyyətini təsdiqləyən beynəlxalq sənəddir. Bu sertifikatın əldə olunmasını zərurətə çevirən başqa amil də var. Belə ki, beynəlxalq operatorlar trafik mübadiləsi zamanı DATA Mərkəzlərin “Uptime” İnstitutunun müəyyənləşdirdiyi meyarlara cavab verməsini əsas tələb, mütləq şərt kimi irəli sürürlər. Ona görə də hazırda alman şirkəti ilə yanaşı, “Uptime” İnstitutu ilə də sertifikatlaşdırma məsələlərinin həyata keçirilməsi ilə bağlı işlər aparılır.
M.Quliyev qeyd edib ki, MESM-in qurulması üçün müvafiq məkan seçilib, ATS-594 binası tamamilə boşaldılıb və hazırda belə mərkəzlər üçün nəzərdə tutulan texniki tələblərə əsasən binada rekonstruksiya işləri aparılır. Respublikamız üçün olduqca önəmli və qürurverici əhəmiyyət daşıyan bu layihə də peyk və digər layihələr kimi İT sahəsində güclü infrastrukturun qurulmasına yönəlib. Bundan başqa, Data Mərkəzin yaradılması yeni iş yerlərinin açılmasına imkan verəcəkdir. Bu baxımdan, layihənin iqtisadiyyata, ölkənin ümumi inkişafına verəcəyi töhfələri də gözləniləndir.