Bakı, 16 mart, AZƏRTAC
“Türkiyə Universitetləri Məzunları” İctimai Birliyinin (TUMİB) “Azərbaycan Gəncliyi 2011-2015-ci illərdə” Dövlət Proqramının həyata keçirilməsi üzrə tədbirlər planına uyğun olaraq reallaşdırdığı “Sağlam həyat tərzi - gənclərin iştirakı ilə ictimai müzakirələr” adlı layihə çərçivəsində martın 16-da Xaçmaz şəhərində gənclərin iştirakı ilə konfrans keçirilib.
TUMİB-dən AZƏRTAC-a bildiriblər ki, Xaçmaz Rayon İcra Hakimiyyətinin ictimai, siyasi və humanitar məsələlər üzrə şöbəsinin baş məsləhətçisi Pərviz Əmircanov tədbirdə çıxış edərək, son illər ölkəmizdə gənclərin rifah halının yaxşılaşdırılması istiqamətində görülən işlərdən danışıb.
Xaçmaz Rayon Gənclər və İdman İdarəsinin əməkdaşı Elman Məmmədov təmsil etdiyi qurumun gənclərin fərdi bacarıqlarını üzrə çıxarmaq məqsədilə həyata keçirdiyi layihələr barədə məlumat verib. O deyib ki, xaçmazlı gənclər rayonun ictimai-siyasi həyatında yaxından iştirak edirlər.
TUMİB-in sədri Çingiz Bayramov bildirib ki, layihənin əsas məqsədi regionlarda yaşayan gənclər arasında sağlam həyat tərzi və reproduktiv sağlamlıq barədə maarifləndirmə işi aparmaqdır. Azərbaycan hökuməti gənclərimizin sağlam həyat tərzini mənimsəməsi üçün müxtəlif tədbirlər həyata keçirir. “Azərbaycan gəncliyi 2011-2015-ci illərdə” Dövlət Proqramının həyata keçirilməsi bu siyasətin əsasını təşkil edir. Vətəndaş cəmiyyəti institutlarının vəzifəsi bu siyasəti dəstəkləmək, onun icrasına töhfə verməkdir.
TUMİB İdarə Heyətinin üzvü Seymur Verdizadə cəmiyyətin həyatında region gənclərinin rolunun artırılmasına ehtiyac olduğunu deyib.
Tədbirdə Prezident İlham Əliyevin Azərbaycan gənclərinin rifah halının və intellektual səviyyəsinin yüksəldilməsi istiqamətində gördüyü işlərdən danışılıb, bu sahədə zəngin qanunvericilik bazasının yaradıldığı qeyd olunub.
Sonda tədbir iştirakçılarının sualları cavablandırılıb.