Bakı, 16 mart, AZƏRTAC
Koreya Beynəlxalq Əməkdaşlıq Agentliyi (KOICA) və Azərsu Açıq Səhmdar Cəmiyyəti (ASC) “Abşeron yarımadasında su çatışmazlığı üzrə ümumi həll: Abşeron yarımadasının Kürdəxanı qəsəbəsində su təchizatı və kanalizasiya sisteminin yaradılması” layihəsinin uğurla tamamlanmasına həsr olunmuş birgə açılış mərasimi həyata keçiriblər.
KOICA-dan AZƏRTAC-a bildirilib ki, bu münasibətlə keçirilən tədbirdə çıxış edən səhmdar cəmiyyətin sədri Qorxmaz Hüseynov layihənin respublikanın regionları və kəndlərində yerli bulaqlardan və yeraltı su mənbələrindən istifadə etməklə əhalinin təmiz su ilə təmin edilməsinə dair Dövlət proqramına tam uyğun şəkildə icra edildiyini deyib.
Qorxmaz Hüseynov layihənin icrasında KOICA-nın rolunun əhəmiyyətini vurğulayıb və yeni sistemin su təchizatı və kanalizasiya sisteminin keyfiyyətinə müsbət təsir göstərəcəyini qeyd edib.
Koreyanın ölkəmizdəki səfiri Çoi Suk-İn təmsil etdiyi dövlətin qrant ayırması hesabına həyata keçirilən bu layihənin Koreya-Azərbaycan arasında ikitərəfli əlaqələrin gücləndirməklə yanaşı, yerli vətəndaşların həyat səviyyəsinin yüksəldilməsinə töhfə verəcəyini də diqqətə çatdırıb.
KOICA baş ofisinin vitse-prezidenti Kim In bu layihənin su çatışmazlığından əziyyət çəkən yerli əhalinin stabil su ilə təmin edəcəyini bildirib. O, “Pirşağı çirkab su təmizləyici qurğusu”nun tikintisinə dair Azərbaycanla Koreya arasında kredit sazişi imzalandığını qeyd edərək bu layihənin səmərəliliyinin artıracağına və layihənin Koreyanın Rəsmi İnkişaf Yardımı üzrə aparıcı layihə olacağına ümid etdiyini deyib.
Sabunçu Rayon İcra Hakimiyyətinin başçısı Adil Vəliyev su təchizatı və kanalizasiya sisteminin inşasının əhalinin sosial-iqtisadi həyatında böyük rol oynayacağını deyib, KOICA və layihəni icra edən icraçı şirkətlərə layihənin uğurla tamamlanmasına görə öz minnətdarlığını bildirib.
Açılış mərasimindən sonra Hövsanda yerləşən Azərsu Təlim Tədris mərkəzinə baş çəkilib.