Bakı, 16 mart, AZƏRTAC
Azərbaycan Milli Karate Federasiyasının (AMKF) rəhbərliyi martın 19-dan 22-dək İstanbulda keçiriləcək 50-ci Avropa çempionatı ərəfəsində məşqçilər, idmançılar və hakimlərlə görüşüb.
AZƏRTAC xəbər verir ki, idmançılara uğurlar arzulayan federasiya prezidenti Yaşar Bəşirov qarşıdakı Avropa çempionatında milli komandadan yüksək nəticələr gözlənildiyini diqqətə çatdırıb. Baş məşqçi, əməkdar məşqçi Rəhman Hətəmov qarşıya qoyulan məqsədə çatmaq üçün komandanın hazır olduğunu deyib. Milli komandanın kapitanı Şahin Atamov ötənilki uğuru təkrarlamağa çalışacaqlarını söyləyib.
AMKF-nin birinci vitse-prezidenti İlham Qasımzadə qarşıdan gələn Novruz bayramı münasibətilə federasiyanın kollektivini və idmançıları baş sponsor Azərbaycan Beynəlxalq Bankı tərəfindən ayrılan bayram mükafatları ilə təltif edib.
Azərbaycan milli komandası 2014-cü ilin mayında Finlandiyanın Tampere şəhərində keçirilən Avropa çempionatında 1 qızıl, 2 gümüş və 1 bürünc medal qazanmışdı. Millimiz tarixində ilk dəfə komanda yarışlarında Avropa çempionu olmuşdu.