ABŞ Ukraynanın ziyansız silahlarla təminatına qərar verib.

Ukraynada sülhə nail olmaq üçün hökumətlə üsyançılar arasında danışıqların yeganə yolu Minsk razılaşması ola bilər.

NATO-nun baş katibi Yens Stoltenberq təmas xəttində atəş səsləri gəlsə də, tərəflər Minsk razılaşması əsasında danışıqlar masası arxasına otura biləcəklərini deyir.

Almaniyanın xarici işlər naziri Valter Frank-Ştaynmayer isə Minsk razılaşmasını Ukraynada sülhün zəmanəti hesab etməsə də, başqa alternativin olmadığı ilə də razılaşıb. Bununla belə Ukrayna prezidenti ordunun özünümüdafiə məqsədi ilə atışmalara cavab verməsini qanuni hesab edib.

Ukrayna prezidenti Pyotr Poroşenko isə vurğulayıb ki, Ukrayna öz üzərinə götürdüyü öhdəlikləri yerinə yetirir.

“Biz atəşi dayandırmışıq. Lakin atəşkəs o demək deyil ki, biz açılan atəşə cavab verməməliyik. Hökumət ordunun özünümüdafiə hüququnu təmin edir və əsgərlərin müdafiə üçün hər bir təchizatı var”, - deyə Poroşenko bildirib.

Poroşenko eyni zamanda, Amerika hökumətinin Ukraynanın ziyansız silahlarla təmin olunması üçün qərar qəbul etdiyini də açıqlayıb.

ABŞ höküməti isə Ukraynaya əlavə hərbi yardım göndərmək qərarının ardınca Beynəlxalq Valyuta Fondunun direktorlar şurası 17.5 milyard dolların ayrılmasını planlaşdırıb. Ukraynanın baş naziri Arseniy Yatsenyuk isə söyləyib ki, 4 illik borc proqramına görə, Ölkədə bir sıra islahatlar aparılacaq. İsveç isə Ukraynaya 100 milyon dollar dəyərində faizsiz kredit ayırmağa qərar verib.



Mənbə
ANS TV