Bakı, 12 mart, AZƏRTAC
Martın 12-də Dini Qurumlarla İş üzrə Dövlət Komitəsinin sədri Mübariz Qurbanlı “Amerika günləri” festivalı çərçivəsində ölkəmizdə səfərdə olan ABŞ-ın Corctaun Universitetinin imamı Yəhya Hendi ilə görüşüb.
Komitənin mətbuat xidmətindən AZƏRTAC-a bildiriblər ki, görüşdə sədr Mübariz Qurbanlı ölkəmizin tolerantlıq ənənələri, dövlətin multikultutalizm siyasəti, dini konfessiyalar arasındakı münasibətlərdən danışaraq deyib ki, Azərbaycanda dini etiqad azadlığı tam təmin olunub. Bildirib ki, ölkəmizdə dinə yüksək səviyyədə dövlət qayğısı var və bu qayğı bütün konfessiyaları əhatə edir.
Corctaun Universitetinin imamı Yəhya Hendi Azərbaycana səfərindən və burada keçirdiyi görüşlərdən danışaraq deyib ki, artıq ikinci dəfədir ölkəmizə səfər edir. Qeyd edib ki, Azərbaycan ona doğma ölkədir və buradakı sürətli inkişaf prosesi onu sevindirir. Dini icmalarla keçirdiyi görüşlərdən bəhs edən Yəhya Hendi Azərbaycandakı dini tolerantlıqdan, dini icmaların fəaliyyətindən məmnunluq duyduğunu, ölkəmizin tolerantlıq modelinin bütün dünya üçün nümunə ol biləcəyini vurğulayıb.