Xaçmaz, 12 mart, Elxan Yusifli, AZƏRTAC
Xaçmaz rayonundakı Heydər Əliyev adına Mədəniyyət Mərkəzinin nəzdində fəaliyyət göstərən dram kollektivinə xalq teatrı statusu verilib. Azərbaycanda milli teatrın yaranmasının 142-ci ildönümü ərəfəsində Mədəniyyət və Turizm Nazirliyi tərəfindən bu statusa layiq görülən kollektiv 50 ilə yaxındır ki, rayonda fəaliyyət göstərir.
Xaçmaz rayon Mədəniyyət və Turizm Şöbəsinin müdiri Nazim Ağayev AZƏRTAC-a müsahibəsində bildirib ki, dram kollektivinə xalq teatrı statusu verildikdən sonra işə istedadlı aktyorların cəlb olunması istiqamətində tədbirlər görülür. Artıq aprel ayından etibarən yeni heyətlə tamaşaların səhnələşdirilməsinə başlanılacaq. Tamaşalara yerli aktyorlarla yanaşı, paytaxtdan dəvət olunmuş tanınmış sənət ustalarının da cəlb olunması nəzərdə tutulub.
Qeyd edək ki, dram kollektivi fəaliyyəti ərzində tamaşaçılara 40-dan çox səhnə əsəri təqdim edib.