Meksika körfəzində ekoloji fəlakətə səbəb olmuş BP şirkəti, Bakıda oxşar qalmaqalla üzləşib. Düzdür, burada çirklənmənin miqyası Birləşmiş Ştatlardakı qədər böyük olmasa da, buna ciddi yanaşılır. Məsləylə bağlı BP, eləcə də Ekologiya və Təbii Sərvətlər Nazirliyindən də açıqlama verilib.

ANS TV-nin məlumatına görə, BP şirkətinin “İstiqlal” quyusunda qazıntı işləri apararkən Xəzər dənizinə kimyəvi maddələr axıtması barədə mətbuatda məlumatlar yayılıb. “MUD” adlı bu maddənin su hövzəsindəki canlı həyat üçün təhlükə olduğu bildirilir. Araşdırma nəticəsində məlum oldu ki, qazıntını mart ayının 5-də “Şahdəniz” qaz yatağında BP-nin podratçı şirkəti olan “Caspian Drilling Company” aparırmış.

Mütəxəssislərin bildirdiyinə görə, bu tip qazıntıları aparmaq üçün 500 metrə qədər olan dərinlikdə su əsaslı qazma məhlulundan, daha dərinlikdə isə sintetik, yəni kimyəvi əsaslı mayedən süxurların yumşaldılması üçün istifadə olunur. Və təbii ki, belə olan halda dənizin çirklənməsi və bunun nəticəsi olaraq fauna və floranın məhv olma təhlükəsi yaranır. Baxmayaraq ki, canlı aləm əsasən 30 metrə qədər olan dərinlikdə mövcuddur.

Məsələylə bağlı BP şirkətinin Azərbaycanda fəaliyyət göstərən Xəzər mərkəzinin ünsiyyət məsələləri üzrə meneceri Tamam Bayatlı axıntı faktını təsdiqlədi. Lakin onun sözlərinə görə, qazıntı zamanı maye əsaslı məhluldan istifadə edilib. Bu isə aşağı toksikliyə malik olduğundan, suda tez parçalanaraq ətraf mühit üçün heç bir təhlükə törətmir:

“Bununla bağlı xüsusi olaraq manitorinq aparılacaq. Suyun keyfiyyəti yoxlanılacaq. Hazırda qazma qurğusunun ətrafındakı hövzədə monitorinq aparılır. Hər hansı bir dəyişiklik olarsa, o zaman lazımi tədbirlər görüləcək. Biz ümumiyyətlə dənizə 0 dərəcədə sızmanın olmasını ilə bağlı öz üzərimizə öhdəlik götürmüşük”.

Xanım Bayatlı onu da vurğuladı ki, Ekologiya və Təbii Sərvətlər Nazirliyinin verdiyi ətraf mühitə təhlükənin qiymətləndirmə sənədində axıntının, hətta səthdən tökülməsi nəzərdə tutulub. BP isə daha təhlükəsiz, sızıntını 5 min metr dərinlikdən edib. Elə anlaşılmazlıq da bu səbəbdən baş verib.

Faktla əlaqədar Ekologiya və Təbii Sərvətlər Nazirliyindən bildirildi ki, quruma BP şirkəti tərəfindən heç bir məlumat daxil olmayıb. Lakin əldə edilən məlumatlar əsasında, təcili olaraq həmin əraziyə ekspedisiya təşkil edib, araşdırmalara başlanılıb.

Lakin bütün şirkətlərə su əsaslı məhluldan istifadə olunmaq tapşırıldığından nazirlik çirklənmənin olmayacağını ehtimal edir. Bununla belə “İstiqlal” buruğunda ətraf mühitə ziyan dəyməsi faktı müəyyən olunarsa, ziyanın həcmi hesablanacaq və qanuna müvafiq tədbirlər görüləcək.

Mənbə
ANS TV