Bakı, 11 mart, AZƏRTAC
ATƏT-in insan alveri ilə mübarizə üzrə xüsusi nümayəndəsi və əlaqələndiricisi Mədinə Yarbuzinovanın rəhbərlik etdiyi nümayəndə heyəti Azərbaycan Respublikasının İnsan Hüquqları üzrə Müvəkkili (Ombudsman) İnstitutunda olub.
Ombudsman Aparatının rəhbəri Aydın Səfixanlı ilə keçirilən görüşdə qonaqlar ölkəmizdə insan alverinə qarşı mübarizə, həyata keçirilən kompleks tədbirlər, müvafiq qanunvericiliyin təkmilləşdirilməsi barədə məlumatlandırılıblar. Aparat rəhbəri Azərbaycan ombudsmanının insan hüquqlarının müdafiəsi sahəsində fəaliyyətində insan alverinə qarşı mübarizənin də mühüm yer tutduğunu bildirib, bu istiqamətdə görülən işlərdən söhbət açıb.
Mədinə Yarbuzinova təmsil etdiyi qurumun fəaliyyəti və mandatı barədə məlumat verib, ATƏT tərəfindən insan alverinə qarşı mübarizə sahəsində tövsiyələrin hazırlandığını qeyd edib. O, həmin tövsiyələr üzrə Azərbaycanda xeyli iş görüldüyünü, islahatlar aparıldığını, qanunvericiliyin təkmilləşdirildiyini müsbət hal kimi diqqətə çatdırıb.