Bakı, 10 mart, AZƏRTAC
Bakı Slavyan Universiteti (BSU) və Respublika Milli Qəhrəmanlar İctimai Birliyinin birgə təşkilatçılığı ilə Azərbaycan Milli Ordusunun mühəndis istehkam qüvvələrinin 23–cü ildönümü ilə əlaqədar N saylı hərbi hissənin zabit və əsgərləri ilə görüş keçirilib.
BSU-dan AZƏRTAC-a bildirilib ki, görüşdə bu ali məktəbin rektoru, professor Asif Hacıyev Prezident İlham Əliyevin yorulmaz fəaliyyəti nəticəsində Milli Ordumuzun gücləndiyini, işğal olunmuş torpaqlarımızın azad olunacağı günün uzaqda olmadığını vurğulayıb. Vətənə məhəbbətdən danışan rektor əsgərlərə daim möhkəm olmağı arzulayıb, onları qarşıdan gələn Novruz bayramı münasibətilə təbrik edib.
Respublika Milli Qəhrəmanlar İctimai Birliyinin sədri Mirbəşir Seyidzadə, Milli Qəhrəman Asif Məhərrəmov adına İnkişaf Fondun sədri Ədalət Məhərrəmov və başqaları hərbi xidmətdə olan əsgərləri hər zaman mübariz, vətənpərvər olmağa səsləyiblər.
Tədbir BSU-nun yaradıcı gənclərinin və Murad Rzayevin rəhbərlik etdiyi “Qarabağ bülbülləri” mahnı ansamblının konsert proqramı ilə davam etdirilib.
Qarşılıqlı maraq doğuran görüş hərbi hissənin komandiri, zabit və əsgərləri tərəfindən xoş sözlərlə dəyərləndirilib. İştirakçılar BSU rəhbərliyinə minnətdarlıqlarını bildiriblər.
Sonda xidmətində fərqlənən hərbçilərə BSU-nun rəhbərliyi və Respublika Milli Qəhrəmanlar İctimai Birliyi adından təşəkkürnamələr və xatirə hədiyyələri təqdim olunub.