Xaçmaz, 10 mart, Elxan Yusifli, AZƏRTAC
Xaçmaz rayonu üzrə 15 saylı Tibbi-Sosial Ekspert Komissiyası (TSEK) yeni iş şəraiti və müasir avadanlıqlarla təmin olunub.
AZƏRTAC xəbər verir ki, martın 10-da Əmək və Əhalinin Sosial Müdafiəsi Nazirliyinin (ƏƏSMN) əməkdaşları yerli icra strukturlarının nümayəndələri ilə birlikdə 15 saylı TSEK əməkdaşlarının fəaliyyəti, vətəndaşlara tibbi-sosial ekspertiza xidmətinin göstərilməsi, eləcə də əlillik müayinələrinin aparılması üçün yaradılmış şəraitlə tanış olublar.
Əmək və əhalinin sosial müdafiəsi nazirinin müavini Natiq Məmmədov bildirib ki, ölkəmizin bütün regionlarındakı TSEK-lərin maddi-texniki bazasının yaxşılaşdırılması, eləcə də əlillik müayinələrinin müasir tibbi avadanlıqlar vasitəsilə aparılması nazirliyin diqqət mərkəzindədir. Artıq ƏƏSMN-nin 38 region üzrə TSEK-lərindən 19-u müasir iş şəraitinə malikdir. Bu işlər sürətlə aparılır və yaxın vaxtlarda digər TSEK-lərin də müasir iş şəraiti ilə təminatı həyata keçiriləcək. Bu işlərdə əsas məqsəd vətəndaşların TSEK-lər tərəfindən normal iş şəraitində qəbul edilməsi, onların keyfiyyətli xidmətlə təmin olunmasıdır. Eyni zamanda, bu komissiyalar nazirliyin həmin region üzrə digər yerli qurumları ilə eyni binalarda yerləşdirilir. Bu da əhaliyə sosial təminat növləri, məşğulluğun təminatı, əmək hüquqlarının müdafiəsi, eləcə də tibbi-sosial ekspertiza ilə bağlı xidmətlərin vahid məkanda göstərilməsinə, bu qurumların öz fəaliyyətlərini bir-biri ilə əlaqəli şəkildə və daha səmərəli həyata keçirməsinə imkan verir.
Diqqətə çatdırılıb ki, son vaxtlarda tibbi-sosial ekspertiza sahəsində şəffaflığın təmin olunması üçün bu sahəyə nəzarət daha da artırılıb. Bunun nəticəsində əlilliyi olan şəxslər arasında tam və hissəvi reabilitasiya göstəriciləri yüksəlib, əlillik müayinəsi sisteminin avtomatlaşdırılması məqsədilə bir sıra işlər həyata keçirilib.
Bildirilib ki, nazirliyin Mərkəzləşdirilmiş İnformasiya Sistemində tibbi-sosial ekspertiza və reabilitasiya alt-sisteminin tətbiqi nəticəsində əlillik müayinəsi üçün müvafiq qurumlar arasında elektron məlumat mübadiləsinin təmin edilməsi əlillik təyinatlarının şəffaf şəkildə aparılmasına şərait yaradıb.
Sonda komissiyanın əməkdaşlarına əhaliyə xidmətin yüksək səviyyədə və şəffaflıq prinsipləri əsasında təşkili, əlilliyi olan şəxslərin reabilitasiya potensialının müəyyən olunması üçün nazirliyin bərpa-müalicə mərkəzləri ilə əlaqəli fəaliyyətin gücləndirilməsi barədə tapşırıqlar verilib.