Bakı, 7 mart, AZƏRTAC 
“Bakı-2015”də samboçular arasındakı yarışlarda İspaniyanı təmsil edəcək idmançılar məlum olub.
Luis Menendez və Yaiza Ximenez sambo üzrə İspaniyanın çempionu olublar. L.Menendez Madriddə keçirilmiş final görüşündə 74 kq çəki kateqoriyasında həmyerlisi Viktor Karavakanı məğlub edərək həm özünün İspaniya çempionu titulunu qoruya bilib, həm də “Bakı-2015” Avropa Oyunlarında iştirak etmək hüququ qazanıb.
“Baku-2015”dən AZƏRTAC-a bildiriblər ki, Avropa Oyunlarında kişi samboçular arasındakı yarışlarda İspaniyanı L.Menendez təmsil edəcək. Bakıdakı oyunlarda kişilər arasında ən çox samboçu 74 kq çəki kateqoriyasında yarışacaq. Bu kateqoriya üzrə yarışlarda “Bakı-2015”də Fransa, İrlandiya, İtaliya, Latviya, Polşa, Sloveniya və Türkiyədən bir samboçu iştirak edəcək.
“Bakı-2015” Avropa Oyunlarında iştirak etmək hüququ qazanan digər ispaniyalı qadın samboçu Yaiza Ximenez olub. O, Madriddə qadınlar arasında 60 kq çəkidə tam üstünlüklə çempion adına sahib olub. Y. Ximenez həm də keçən il Avropa çempionatında iştirak edib.