Bakı, 5 mart, AZƏRTAC
Beynəlxalq Telekommunikasiya İttifaqı (BTİ) yeni onlayn platforma yaradaraq informasiya kampaniyasına başlayır. Yeni sayt (www.itu150.org) BTİ-nin bu il qeyd olunan 150 illiyi münasibətilə nailiyyətlərini və hazırkı fəaliyyətini işıqlandırmaq məqsədilə yaradılıb.
Saytda BTİ-nin yarandığı 17 may 1865-ci ildən indiyədək tarixində baş verən əsas informasiya-kommunikasiya texnologiyaları (İKT) tarixinə interaktiv ekskursiya etmək mümkün olacaq. İnteraktiv xəritə dünyada təşkil edilən bütün fəaliyyət növlərinə çıxışı təmin edir. Hazırda 30 ölkədə planlaşdırılan 60 fəaliyyət növü təqdim olunub, yeni fəaliyyət növlərinin isə 2015-ci ilin sonunadək təqdim edilərək qəbul olunması gözlənilir. Təqdimatlar arasında sərgilər, müsabiqələr, nəşrlər, məqalələr, praktikum seminarlar, saytlar yer alacaq.
Cari ilin hər ayında İKT ilə bağlı ayrıca mövzu seçiləcək və iştirakçılar öz fəaliyyətlərini xüsusi maraq doğuran mövzu ilə əlaqələndirə biləcəklər. Bundan başqa, BTİ ayrılan bu və ya digər mövzuya aidiyyəti olan tərəfdaş təşkilatlarla aparılan işi işıqlandıracaq.
BTİ Birləşmiş Millətlər Təşkilatının (BMT) informasiya-kommunikasiya texnologiyaları (İKT) sahəsində fəaliyyət göstərən aparıcı təsisatıdır. 150 il ərzində BTİ qlobal əsasda radiotezlik spektrindən birgə istifadənin koordinasiyasını həyata keçirir, peyklər üçün orbital mövqelərin ayrılmasında beynəlxalq əməkdaşlığa yardım edir, inkişaf etməkdə olan ölkələrdə rabitə infrastrukturunun yaxşılaşdırılmasına xidmət edir və dünyada rabitə sistemlərinin geniş diapazonunun maneəsiz fəaliyyətini təmin edən standartlar hazırlayır.
Qeyd edək ki, Azərbaycan Beynəlxalq Telekommunikasiya İttifaqının (BTİ) fəal üzvü kimi 1992-ci ildən ittifaqın bütün təşəbbüslərində yaxından iştirak edir. 2014-cü ildə Koreyanın Busan şəhərində keçirilmiş BTİ-nin Səlahiyyətli Konfransında ölkəmiz ilk dəfə olaraq Beynəlxalq Telekommunikasiya İttifaqının Şurasına üzv seçilib.