Bakı, 5 mart, AZƏRTAC 
Martın 5-də Ukraynada bu ölkənin Donetsk şəhərindəki Zasyadko adına daş kömür mədənində baş vermiş partlayış nəticəsində həlak olan şaxtaçıların xatirəsinə matəm elan edilib.
AZƏRTAC Euronews telekanalına istinadla xəbər verir ki, bu gün ölkənin bütün ərazisində dövlət bayraqları endiriləcək və əyləncəli proqramlar ləğv ediləcək.
Partlayış baş vermiş mədən qondarma “Donetsk Xalq Respublikası”nın nəzarət etdiyi ərazidə yerləşir. Artıq Rusiya Fövqəladə Hallar Nazirliyi ərazidə xilasetmə işlərinin aparılması üçün öz köməyini təklif edib.
Ən son məlumatlara görə, partlayış nəticəsində ölənlərin sayı 33 nəfərə çatıb.
Xatırladaq ki, martın 4-də səhər tezdən mədəndə metan qazının sızması nəticəsində partlayış baş verib. Həmin vaxt mədəndə 230 nəfər olub.
Zasyadko adına mədən keçmiş SSRİ məkanında daş kömür hasil edən ən təhlükəli müəssisələrdən biri kimi tanınır. Son 15 ildə burada 5 ciddi qəza qeydə alınıb. 2007-ci il noyabrın 18-də baş vermiş partlayış 101 şaxtaçının həyatına son qoymuşdu.